Gæti komið ICELANDAIR á kaldan klakann

Nú væri betra ef við værum komin í ESB.

Nýi flugmálasamningur ESB og USA merkir auðvitað gjörbreytingu í samkeppnisumhverfi Icelandair. Í stað þess að Ísland hafi miklu betri og frjálsari samning við USA fyrir hönd sinna flugfélaga eins og verið hefur um áratugi, er ESB nú með með frjálsari samning en Ísland t.d. mega nú hvaða flugfélög ESB sem er ekki aðeins fljúga til hvaða borgar sem er í USA á hvaða skilmálum sem þau vilja heldur líka á milli hvaða borga sem er í USA þ.e. stunda innanlandsflug þar.

Fyrirhyggjuleysi okkar að sækja ekki um ESB aðild er algjört og á örugglega eftir að koma fram í stærri málum en þessu á næstu árum.

Flugsamkomulag milli Bandaríkjanna og ESB tekst á loft

Tvær litlar kók á dag í 50 ár eru 6.205.000,- kr.

Þar sem við erum ekki vön að reikna kostnað á 50 ára grunni er slík framsetning villandi eins og tölurnar eru settar fram samkvæmt frétt Mbl.is (sjá næsta blogg hér fyrir neðan). Fáa grunar t.d. að tvær litlar kók á dag í 50 ár kosti 6.205.000 kr. þ.e. yfir sex milljónir króna.

Á 50 árum eftir lagabreytingu sem ekki fór í gegn

Hér eru settar fram í frétt Moggans (sjá neðst) heildar tekjur Hafnfirðinga næstu 50 ár af álverinu og þessir útreikningar byggja á lagabreytingum sem ekki urðu. Einnig undarlegum forsendum eins og yfir 560 milljón kr sparnaði á landi vegna þess að háspennulínur yrðu settar í jörðu, en vel að merkja þá þarf þess ekki ef álverið fer, og svo er tekið fram að tjón af mengun er ekki áætlað og því ekki tekið með í dæmið á móti.

Hafnarfjörður hefur fram til þess borið skarðan hlut frá borði því þegar ÍSAL var reist sá þjóðin svo miklum ofsjónum yfir mögulegum gróða Hafnarfjarðar af álverinu að sett voru sérstök lög til að ríkið en ekki Hafnarfjörður nyti mest allra skattteknanna af Ísal. Því hafa það aldrei verið nema smápeningar sem Hafnarfjörður hefur haft í tekjur af álverinu og álverið átti höfnina fyrstu 25 árin og því engar tekjur þaðan.

Af sömu ástæðu var lögð sérstök áhersla á að allt höfðuborgarsvæði nyti atvinnutækifæranna í álverinu og því var frá upphafi sett á öflugt rútukerfi til að sækja starfsmenn ef öllu höfuðborgarsvæðinu til að starfa þar. Einstaka verktakar hafa svo orðið feikna ríkir af viðskiptum við álverið og haslað sér völl í öðrum stórviðskiptum í framhaldinu, - það eru ekki Hafnfirðingar eftir því sem ég kemst næst þó svo ég véfengi ekki að hafnfirsk fyrirtæki hafi umtalsverð viðskipti við álverið.

Punkturinn er þó sá að Hafnarfjörður hefur ekki notið sem skyldi arðs af álverinu sem þó mengar loftið þeirra brennisteini og flúor alla daga. Heldur hefur arðurinn skipulega verið fluttur framhjá Hafnarfirði. Ef álverið færi eða fengi ekki að stækka er enginn vafi á að annað álver fengi að rísa í staðin t.d. fyrir utan Keflavík til að nota þá orku sem losnaði, og þau fyrirtæki sem hafa reynslu af að þjónusta álver fengju örugglega sitt þar ef þau vildu.

Tekjuauki Hafnfirðinga af stækkun álvers 3,4-4,7 milljarðar króna

Hvað er að valda öllum þessum vatnstjónum?

Merkilegt hve mörg vatnstjón hafa orðið nú á örfáum dögum, nú síðast í húsi HR sem áður var hús Morgunblaðsins. Ekki er augljós sameiginleg orsök - nema þá ef vera kynni að bilunin í dælubúnaði Orkuveitunnar um daginn þegar eldingu laust niður í rafkerfið, hafi valdið svona miklu álagi á veitukerfið að í kjölfarið hrökkvi í sundur veikir hlekkir þó svo nokkrir dagar líði. Ætli þetta verði kannað í því ljósi? Kannski brustum lagnir ,,næstum því" víða sem svo verða að gefa sig alveg næstu mánuði eða ár?

Tölvuvert tjón á loftum í húsi HR vegna vatnsleka

Gott hjá Norðmönnum

Ég skil aldrei afhverju Ísraelar og Bandaríkjamenn neiti ekki aðeins bæði að viðurkenna tilverurétt Palistínu og ríkisstjórn Palistínu, heldur líka að Ísrael þurfi að fara að samþykktum Sameinuðu þjóðanna þá sjaldan USA hefur ekki eitt ríkja beitt neitunarvaldi, en gera það svo að tilliástæðu til að svelta Palistínumenn að þeir viðurkenni ekki Ísraelsríki, ríkið sem hersetur þá, rænir þá löndum og sveltir börnin þeirra.

 

Viðbót um Guðs útvöldu:
Hugmyndin um Guðs útvöldu er afar hættuleg venjulegu fólki því hún stendur í vegi fyrir því að það fólk geti sett sig í spor annarra sem annars er mikilvægasta þroskastigið og kemur oftast með unglingastiginu, að geta sett sig í spor annarra og fundið þeirra sársauka og þeirra tilfinningar. Ef hinsvegar því er bætt við uppeldið að aðrir séu öðruvísi, óæðri og ekki eins þóknanlegir Guði stendur það í vegi þess að viðkomandi geti meðtekið þennan þroska með eðlilegum hætti. Þegar svo við það bætist að trúarbragðahöfundurinn Móse segir þjóð sinni að gjöreyða borgum sem hún vilji leggja undir sig, vægja engum og þakka Guði fyrir ræktarland sem þeir hafi ekki sjálfir sáð, hús sem þeir hafi ekki sjálfir reist, og fagra hluti sem þeir hafi ekki sjálfir smíðað, þá í það minnsta er þeim ekki hollt að við hin tökum undir um að tilfinngar og réttindi Palistínumanna séu léttvægari en Ísraelsmanna. - Ég held að jafnvel Guð sé ekki sáttur við það.

Norðmenn aflétta viðskiptabanni á heimastjórn Palestínumanna

Stoltur af börnunum mínum í dag

Yngri sonur okkar Einar Axel fékk 100 þúsund krónur í verðlaun fyrir fyrsta sæti í stæðrfræðikeppni framhaldsskólanna í gær, en fjögur eftsu sætin tryggja jafnframt sæti á Ólympíukeppninni í stærðfræði  sem verður í Víetnam í sumar. Einar er á þriðja ári í sínum menntaskóla og það verður nú í þriðja sinn í röð sem hann öðlast sæti í Ólympíukepninni. Fyrst í Mexikó en þar gekk einmitt yfir fellibylurinn Emily af styrknum 4-5 daginn áður en átti að halda heim, sama sumar og Katrín fór yfir New Orleans. Áður náðu þeir þó að sjá píramída Mayanna og margt fleira merkilegt. Í fyrra var keppnin í Slóveníu og var bæði Alpanna og Adríahafs vitjað og ísl liðið náði besta árangri sínum fram til þessa, og svo núna í Víetnam. Annars náði hann einnig ólýmpíusæti í eðlisfræði sem haldin verður í Íran í sumar en þar sem keppninar fara fram samtímis verður hann að velja aðra þeirra og fyrsta sætið í stæðrfræðinni fær að ráða því.

Sl. kvöld var líka mikil lukka á frumsýningu í Hagskóla þar sem þau yngri dóttir mín Hafdís Helga með Oddi vini sínu voru aðstoðarleikstjórar. Fyrir aðeins mánuði fóru þau með burðarhlutverk í uppfærslu Hamrahlíðarskólans, en auk þess hefur Hafdís verið með burðarhlutverk í allmörgum ungmennaleiksýningum öðrum, og annast götuleikhús með fleirum, en fyrst þó sem Sól litla í kvikmyndinni "Íslenski draumurinn".

Eldri dóttirin Jórunn Edda er við heimspekinám á Ítalíu og stendur sig frábærlega, var með 30, 28 og 30 af 30 mögulegum á munnlegum heimspekiprófum á ítölsku, þar sem bekkurinn (háskólinn) situr og hlustar á meðan prófað er. Þannig var það víst líka hér fyrir 40 árum. - En Ítalía er svo sannanlega (hugar)heimur útaf fyrir sig.

Haukur Már Helgason eslta "barnið" okkar 28 ára var fyrir nokkru að tryggja heimsókn heitasta heimspekingsins í dag Slavoj Zizek á næstu vikum, en Haukur þýddi eftir hann Órapláguna eða The Plague of Fantasies, sem vonandi nær að koma út í einhverju formu í tenglsum við heimsóknina.

 Eitt sinn sagði við mig vitur kona: „ef foreldrarnir eru ekki montnir af börnunum sínum er það enginn, - og einhver verður að vera það“.  - Ég get ekki neitað því að montið krefst útrásar í dag.

Hæfilega stór Sjálfstæðisflokkur væri 25%

Með fullri viðringu fyrir hægri mönnum á Íslandi, svo ekki sé talað um honum Tryggva afa mínum heitnum sem var ekta fínn sjálfstæðislokksmaður í gegn, þá væri ágætt að íslenskt stjórnmálalíf þróaðist þannig að 25% væri sigur fyrir íslenska hægri flokkinn. Til þess að svo geti orðið þarf þó Samfylkingin að verða miklu stabílli og formaður hennar á hverjum tíma og forysta að hafa traustari pólítska sjálfsmynd af sér og flokknum til að telja sig ekki þurfa að hlaupa sífellt eftir dægurmálum en gleyma grundvallaratriðunum: "Frelsi, jafnrétti, bræðaralag" og þá er ekki bara átt við jafnrétti kynjanna, og með bræðralagi að sjálfsögðu allt verlferðarkerfið í sinni bestu mynd.

Hægrimenn sigurvegarar kosninganna í Finnlandi

Skattaloforð svikið - Áfall fyrir álverssinna

Það hlýtur að vera talsvert áfall fyrir álverssinna að álverinu sé ekki gert unnt að efna loforð sitt um að greiða sín gjöld til Hafnarfjarðar eins og önnur fyrirtæki í bænum. Það er nefnilega þannig að það er langt í frá að Hafnarförður hafi fengið af álverinu gjöld eins og af öðrum fyrirtækjum. Það þótti á sínum tíma einmitt ekki réttlátt að Hafnarfjörður græddi svo neinu nam á álverinu gróðinn ætti að ganga til ríkisins og því voru sett sér lög sem færðu ríkinu mest allar skatttekjur sem hefðu átt að ganga til Hafnarfjarðar ef sömu reglur giltu um álverið og önnur fyrirtæki.

Reyndar er merkilegt að álverið hefur ekki lagt sérstaklega til samfélagsmála í Hafnarfirði fyrr en ljóst var 2002 að Hafnarfjarðarbær ætlaði að leggja stækkunina í dóm bæjarbúa, en hefur tekið vel til hendinni síðustu ár t.d. með stuðningi við íþróttaélögin, og Björgvin Halldórsson.

Á nokkuð að bíða og sjá hvort Hafnfirðingar samþykki örugglega? - Reyndar er ég viss um að stækkun álversins verður samþykkt, hræðslupólitíkin leiðir óhjákvæmilega til þess að margir kjósendur vilja ekki taka ábyrgð á að álverið fari heldur láta öðrum það eftir og greiða því stækkun samþykki eða sitja heima.

Sól í Straumi: Fjárhagsleg rök fyrir samþykki stækkunar Alcan brostin

Ég mun sakna þeirra. - Kemur skoðanalaust fólk í staðin?

Merkilegt nokk þá mun ég sakna nokkurra þingmanna úr öllum flokkum, og reyndar hef ég nokkrar áhyggjur af því ef endurnýjun verður alltof mikil. Við kunnum enn illa að meta reynslu og sanna visku sem ekki verður til nema með aldri og reynslu.

Auk þeirra sem nú munu hverfa úr sölum Alþingis fóru óvenju margir á kjörtímabilinu, ef svo kosningar breyta svona miklu í hlutfalli milli flokkanna eins og skoðanakannanir nú benda til verða alger umskipti og jafnvel aðeins fáir þingmenn með umtalsverða reynslu.

Meðal þeirra sem ég mun sakna er hægláti þingmaðurinn og fyrrverandi ráðherrann Jón Kristjánsson. Ég lærði vel að meta hann þegar ég þurfti oft að sækja ráðstefnur og viðburði á heilbrigðissviði og hann var alltaf mættur til að hlusta á fólk, og þegar hann svo var kominn í félagsmálaráðuneytið og ég var viðstadur afmæli Fjölsmiðjunnar í Kópavogi þá var Jón Kristjánsson aftur mættur þar til að hlusta og hitta venjulegt fólk á sínu sviði. - Ég veit af sömu ástæðu að ekki eru allir ráðherrar svo duglegir að koma og hitta og hlusta á sitt fólk.

Ég mun líka sakna mikið þeirra Rannveigar Guðmundsdóttur og Margrétar Frímannsdóttur, en einnig Halldórs Blöndal þrátt fyrir að vera oft ósammála sjónarmiðum hans þá virðist hann hreinskiptinn og ekki víla fyrir sér að láta vita af því þegar hann er ekki sammála félögum sínum. - Sem stjórnmálamaður hafði hann því þekktar skoðanir en ekki bara flokk.

Formið sem verið hefur á prófkjörum hefur smá saman valið skoðanalaust fólk á listana því til að ná árangri í prófkjörum þar sem hver kjósandi greiðir mörgum frambjóðendum atkvæði þurfa frambjóðendur að hafa gætt þess að fá enga hópa upp á móti sér. Því vinnur frægt fólk sem ekki hefur frægar skoðanir í prófkjörum. Viðkunnanlegir vinna en þeir sem hafa skoðanir eru rægðir og fá því ekki þann breiða stuðning sem hver maður þarf til að ná árangri í svona prófkjöri. - Því sakna ég strax Halldórs Blöndal, hann á þekktar skoðanir.

Annars er Ögmundur Jónasson einn sá þingmaður sem ég hef hvað mestar mætur á þó er ég algerlega ósammála honum um nokkur grundvallaratriði eins og aðild að ESB og fleiri mál. Merkilegt nokk þá virðast einnig 40% stuðningsmanna VG vera ósammála VG um ESB stefnuna. - Það afsannar að fólk hafi farið frá Samfylkingunni vegna ESB stefnu hennar. En Ögmundur á þekktar skoðanir og verður vonandi áfram á þingi þó svo hann og Steingrímur J megi gjarnan skipta um skoðun á ESB.

Fundum Alþingis frestað fram á sumar

Skemmdar tennur og niðurskurður barnabóta.

Ætli skemmdar tennur heillar kynslóðar barna og skerðing barnabóta um 10 milljarða verða helsti minnisvarði þessarar ríkisstjórnar þegar fram í sækir? - Það er kannski ekki nema von að ríkissjóður sé rekinn með hagnaði í einhver ár þegar ríkisstjórn finnst sig engu varða að tannlækningar barna hafa árum saman koðnað niður og bæta svo um betur og skera barnbætur niður um 10 milljarða. - En ætli börnin muni ekki minnast þess þegar fram í sækir - að það var þá þegar Sjálfstæðisflokkurinnn var við völd að ekki fékkst almennilegur stuðningur við tannlækningar þeirra.

Skerðing barnabóta gagnrýnd harðlega

Íbúðahverfi byggð þar sem hraun munu renna

Vallahverfi sem nú rís í nágrenni álversins í Straumsvík er ekki aðeins skipulagt svo nærri uppsprettu mengunar og við öflugustu háspennulínur á Íslandi heldur er það reist á aðeins 850 ára gömlu hrauni þar sem örugglega mun renna hraun aftur, aðeins spurning um hvenær. Næsti eldgígur sem það hraun rann úr er aðeins í nokkurra kílómetra fjarlægð.

Á Reykjanesi verða goshrinur sem standa í um 200 ár og hefjast með um 1000 ára millibili - Nú eru rúm 1000 ár síðan síðsta hrina hófst en hraunið undir Vallabyggð var eitt það síðasta sem rann í þeirri hrinu árið 1151 í Krísuvíkureldum.

Á myndinni sem hér má sjá, er verið að moka í burtu merkilegum eldgíg þeim sem næstur er nokkru höfuðborgarsvæði í heiminum og heitir þá væntanlega bara "gjallnáma" eða eitthvað viðlíka. Ef eitthvað vit væri í okkur hefði Þetta með öðru átt að verða verndaðar minjar og aðdráttarafl ferðamanna en ég held við viljum ekki vita af svona minjum svona nærri okkur. Reyndar er Reykjanesskagi í heild einstakur  þar sem úthfashryggurinn kemur upp á yfirborðið og er eini slíki staður í veröldinni, en önnur eldgosasvæði okkar eru blanda af heita reitnum og Atlantsahafshryggnum, og eru því ekki ómengaður úthafshryggur eins og Reykjnesskaginn.

Við íslendningar erum ótrúlega skammsýnir í skipulagi byggðar, ekki aðeins byggjum við án snjóflóðavarna undir bröttum fjallshliðum þar sem fyrr eða síðar munu falla stór snjóflóð heldur líka á eldfjöllum (Heimaey) og við jaðra þeirra þar sem örugglega fyrr eða síðar mun renna hraun yfir - án neinna fyrirfram hugmynda um hvernig á að verja byggðina þegar þessir alvarlegu atburðir sem fylgja landi okkar munu gerast.

Í ofanálag göngum við afar illa um okkar næsta umhverfi þó við viljum verja fjarlægt hálendið okkar. Eldgosaminjar eru mokaðar í burtu eins og hvert annað rusl og hraun eru rudd langt útfyrir vegstæði við vegagerð sem oft er um þau þvers og kruss.

Afhverju ekki úr 14 í 16 ár?

Það hefur verið svívirða lengi á Íslandi að 14 ára eigi börn að teljast kynferðilega sjálfráða, þannig að þegar þeim aldri væri náð fríaði það fullorðið fólk ábyrgð á kynathöfnum sínum með börnunum ef þau hafa fengist til að samsinna. Í USA er þessi aldur 18 ára en víðast í Evrópu 16 ára. Afhverju hækkuðu þeir það ekki í 16 ár nú í stað 15? Það er enginn að tala um að þessi mörk séu notuð gegn jafnöldrum en þessi lágu mörk gefa fullorðnu fólki sem misnotar ungmenni óþarfa réttlætingu löggjafans.

Fyrningarfrestur á kynferðisafbrotum gegn börnum afnuminn

Er örugglega verið að gæta hagsmuna okkar?

Nú þegar landeigendur hafa myndað með sér öflug og hávær samtök til að berjast gegn framgangi þjóðlendulaganna er enn mikilvægara en áður að alveg ljóst sé að hagsmuna þjóðarinnar sé gætt í fjármálaráðuneytinu. - Vonandi er þessi eftirgjöf ekki til merkis um að hagsmunum okkar sé ekki lengur borgið þar.

Þjóðlendudómi ekki áfrýjað til Hæstaréttar

Samfylkingin: "aftur til upphafsins" - Lausafylgið er á mikilli ferð

Það má merkja af skoðanakönnunum að lausafylgið er á mikilli ferð, nú staldrar það við hjá Sjálfstæðisflokknum.

Reyndar verður Samfylkingin að gefa kjósendum góða ástæðu til að koma til sín ef Sjálfstæðisflokkur á ekki eftir að fá að vaxa enn þegar allir flokkar taka að höggva í VG á næstunni því þaðan verður mest að hafa í kosningabaráttunni eins og staðan hefur verið undanfarið.

Back to the Basics eða aftur til upphafsins ætti að vera þema Samfylkingarinnar við kosningaundirbúning sinn og mótun kosninagstefnuskrár. Þar sem Samfylkingin einfaldlega leggur fyrir sig og kjósendur grundvalalratriði jafnaðarstefnunnar, aftur í grunninn, og rifjar upp grundvallaratriði velferðakerfisins og afhverju Samfylkinin er best til þess fallin að endurreisa velferðarkerfið. - Það yrði útkalla til allra sem hafa stutt velferðarkerfið og hugmyndir jafnaðarmanna. Jafnvel Steingrímur J vísar nú til norræna módelsins sem leiðarljóss þegar í raun það er Samfylkingin sem flokkur íslenskra jafnðarmanna sem alla tíð hefur barist fyrir því, með systurflokkum sínum á Norðurlöndum. - Það væri laust við tækifærismennsku og minniti á stöðugleika grunnstefnu Samfylkingarinnar því umræðan og málefninn byggðu á grundvallaratriðum jafnðarstefnunnar, og full þörf er augljóslega á því.

Íslendingar vilja vera öfgalausir jafnaðarmenn þegar til kastanna kemur og þekkja alvöru réttlæti og velferðakerfi þegar þeir sjá það. - Ef Samfylkingin tjáir ekki afl, yfirvegun og skýra stefnu um grundvallaratriði í anda jafnaðarstefnunnar mun fylgið aðeins flytjast frá VG til Sjálfstæðisflokksins og til Framsóknarflokksins þegar tekið verður að keppa um atkvæðin af fullum þunga. - Og ríkisstjórnin mun halda velli.

Fylgi Sjálfstæðisflokks eykst mikið frá síðustu könnun

Margt mótsagnakennt við varnir á flugvöllum

Það er margt undarlegt og mótsagnakennt við gríðlegar varnir á flugvöllum til að hindra hryðjuverk og oft virðist einfaldlega heilbrigða skynsemi hafa skort í uppskriftina.

Sterk rök má færa fyrir því að í raun séu allar þessar varnir tafir og óþægindi eingögnu til að verja farþega fyrsta farrýmis. Þ.e. hinir safnast nú vegna tafnna í miklu stærri hópum en áður í innritunarsölum, þar sem einfaldast væri, að bera inn ferðtöskur fullar af sprengiefni og ganga út, ef tilgangurinn væri að valda usla í flugi og drepa vesturlandabúa, eins og á að hafa verið tilgangur bretanna sem eiga að hafa ætlað að sprengja flugvélar yir Atlantshafi, nema óþarft væri að deyja sjálfir.

Til að ná sama tilgangi þarf ekki annað en komast í innritunarisalinn á flugstöð. - Þar stoppa hinsvegar Sagaklass-farþegar ekki nema augnablik, því þeir fá forgang við innritun. Þannig er það allstaðar í heiminum. Hertu varnirnar duga þeim því vel en gera almenna farþega varnarlausari þar sem þeir safnast saman enn fleiri og lengur en áður fyrir framan alla vopna- og sprengjuleit. - Ef slíkt gerðist í stórri flugstöð myndi það valda gríðalegri ringulreið, töfum í öllu flugi og ótta.

- Á sama tíma ganga lestir án allra varna eða vopnaleitar, en Sagaklass-farþegar heimsins eru líklega heldur ekki þar á ferð.

Flugmaður í of miklu uppnámi til að fljúga eftir þras við öryggisvörð

Lánshæfismat ríkissjóðs undirstaða bankanna

Mörgum virðist hafa komið á óvart hve skýrt lánshæfismat einkavæddu bankanna er tengt lænshæfismati ríkissjóðs. Nú má reikna með að matið á bönkunum sigi aftur, því ein megin forsendan fyrir góðu mati þeirra er að ríkissjóður muni hlaupa undir bagga ef illa fer hjá bönkunum. Í raun voru þau tengsl mestu duldu verðmæti bakanna og forsendan fyrir útrás þeirra.

Þeir sem keyptu bankana voru ekki síst að kaupa lánshæfismatið, til að geta tekið mikil lán til að skapa mikil umsvif. Þjóðin fékk þó ekki greitt fyrir það en gæti þurft sjálf að greiða fyrir það síðar. Allt hangir þetta saman þannig að ef lánshæfismat ríkisjóðs versnar mikið versna lánakjör sem bankarnir byggja umsvif sín á og endurfjármögnun verður erfiðari, og ef í útlöndum er talið að ríkið íslenska verði að taka mikla áhættu a sig vegna bankanna skerðir það aftur lánshæfismat ríkissjóðs sem aftur skerðir lánshæfismat bankanna og ....

Segja lækkun Fitch á lánshæfismati ríkissjóðs ekki koma á óvart

Norrænt velferðarsamfélag eða ekki???

"Steingrímur J. Sigfússon, formaður Vinstrihreyfingarinnar-græns framboðs (VG), sagði ... í alþingiskosningum í vor verði kosið um hvers konar samfélag menn vilji, norrænt velferðarsamfélag eða ekki."

Ég er satt að segja svolítið áttavilltur yfir þessum orðum Steingríms. Það er nú ekki svo ýkja langt síðan kratarnir voru að sögn allaballa og fyrri eðalkomma ekki í húsum hafandi, stéttasvikarar og verri en íhaldið fyrir að berjast fyrir norræna módelinu. Er ekki kominn tími til að hann biðji kratana afsökunar á fyrri stóryrðum sínum í þeirra garð? - Varla stofnaði Steingrímur sér flokk til að hafa norræna módelið að sínu helsta leiðarljósi nákvæmlega eins og áður kratarnir og nú Samfylkingin?

Steingrímur J: Kyrrstaða verði rofin í jafnréttismálum og RÚV endurheimt

Gott tækifæri til að stíga útúr vitleysunni

Það ætti að afþakka peninginn en lýsa jafnframt yfir að hvalveiðum sé lokið i bili. Þannig væri þetta gott tækifæri fyrir okkur að ganga uppréttir út úr þessum vitleysissirkus sem stofnað var til sl haust.

WSPA bjóða ríkisstjórninni 95.000 pund fyrir tvo hvali og samning

ESB mun ekki vega að grundvallarhagsmunum neins aðildarríkis

Nú þegar helstu andstæðingum ESB-aðildarviðræðna er loks orðið ljóst að öll rök eru fyrir að við myndum ekki aðeins halda fullum raunverulegum yfirráðum yfir okkar fiskimiðum heldur líklega fá hlutdeild í aflaheimildum sem ESB á og/eða kaupir annarstaðar frá, þá er það er undarleg vænisýki að klifa á því að ESB gæti ákveðið eftirá að breyta reglum til að taka af okkur fiskimiðin.

Fyrir utan að það hefur verið mikilvægasta regla ESB frá upphafi að brjóta aldrei gegn grundvallarhagsmunum neins aðaldarríkis, þá má beita sömu rökum gegn öllum erlendum samskiptum okkar.

Sameinuðu þjóðirnar gætu gert okkur nærri hvað sem er, þær hafa t.d. á valdi sínu að hernema ríki og svipta þau ríkisstjórn og fullveldi þ.e. ekki þarf að breyta reglum til þess, -en þurfum við að óttast það? ....Bandaríkin gætu ákveðið að taka Ísland og innlima það, en þurfum við að óttast það? ....ESB gæti nú þegar ákveðið að breyta ýmsum reglum og loka á viðskipti við okkur nema við gerðum eins og þeir vildu í einhverju máli, -en þurfum við að óttast það?

- Því nær sem við erum ákvaraðanatökuferlinu því minni hætta er á að okkur sé sýndur yfirgangur og ósanngirni. Sem aðildarríki væri miklu minni hætta á að ESB gengi gegn grundvallarhagsmunum okkar en þegar við erum utan ESB því ölli hin aðildarríkin verða að geta búist við því sama og eitt þeirra verður fyrir. Þannig að ef ESB myndi brjóta gegn grundvallarhagsmunum eins aðildarríkis geta hin ekki lengur treyst því að verða ekki fyrir því sama. Það er því allt heila samstarfið og bandalagið sem væri í húfi ef ríkin gætu ekki treyst því að slíkt gerðist ekki.

Það er ekki meiri hætta á að ESB myndi eftirá gegn okkar vilja breyta reglum til að svipta okkur fiskimiðunum en að Sameinuðu þjóðirnar ákveðu að nota Ísland sem ruslahaug undir kjarnorkuúrgang heimsins. - Sameinuðu þjóðirnar gætu faktískt gert það en við en hættan á því er engin, þannig einfaldlega fara alþjóðastofnanir og bandalög ekki með vald sitt, og ef vilji væri til þess þyrftum við ekki að gerast aðilar til a þeir brytu svo harkalega gegn okkur, vondukallarnir myndu einfaldlega gera það hvort sem er.

Fulltrúar Samfylkingar: Full yfirráð auk veiðiheimilda annars staðar

Hefur loks lesið kosningaloforð flokksins

Auðvitað er þetta ekki nýtt mál en það er nýtt að loksins virðast Framsóknarmenn hafa dregið fram kosningastefnuskrá sína frá því fyrir fjórum árum og sjá sitt óvænna að þurfa nú í skyndi að efna eitt og annað sem þeir lofuðu þá. - Það er gott svo langt sem það nær.

Þetta er ágæt skilgreining sem höfð er eftir Jóni með þessum hætti í fréttinni sbr.:

"Þá sagði Jón, að hugtakið og raunveruleikinn þjóðareign fæli það í sér, að eignartilkalli eða yfirráðatilburðum einkaaðila, hvort sem um væri að ræða einkaaðila, lögaðila, samtaka, stórfyrirtækja eða gróðaaðila, væri hafnað og hrundið í eitt skipti fyrir öll. Þessi höfnun skipti mjög miklu máli og það öryggi, sem stjórnarskráin veitti. „Hér er því ekki um neinskonar réttaróvissu að ræða," sagði Jón"

Segir frumvarp um auðlindaákvæði eiga áralangan aðdraganda