Óverjandi að MK krefjist fartölva ef ekki sannast árangur

Skólameistari MK segir ungmennum í Kópavogi að fara annað í nám ef þau hafi ekki efni á 130 þúsund króna fartölvu auk trygginga, forrita og tölvutösku og  alls annars kostnaðar af bókakaupum og skólabyrjun.

Það er óásættanlegt að svona sé talað til fjölskyldnanna í bænum og að Menntaskólinn okkar geri þá kröfu til nemenda sinna að þeir eigi hver og einn sína eigin fartölvu til að burðast með hvern dag í og úr skólann þegar unnt er leysa sömu viðfangsefni í öðrum skólum með miklu skaplegri hætti og þjóðhagslega hagkvæmar.

Nú ætti að liggja fyrir niðurstaða um stórbættan námsárangur

Núna eru átta ár síðan þessi stefna var tekinn upp gegn skýrum andmælum samtaka tölvukennara og annarra sem töldu sig hafa þekkingu og reynslu af málinu. Það ættu því að liggja fyrir niðurstöður um bættan námsárangur nemenda MK á móti tölvukaupabyrði og tölvuburðs nemenda. Einnig ætti nú 8 árum seinna að vera unnt að vega árangurinn á móti kostnaðinum.

Til að heimila tilraunir á skólakefinu - tilraunir með börnin okkar, ætti þess alltaf að vera krafist að ljóst væri fyrirfram hvernig árangurinn verður mældur, -hvað teldist ásættanlegur árangur og hvað ekki og hvað sýndi að rétt væri að hætta tilrauninni til að valda ekki frekari skaða. Hér er á ferð tilraun byggð á tilgátu Björns Banasonar þv. menntmálaráðherra um snylligáfuna sem myndi kvikna af að hafa fartölvu í fanginu alla daga -og MK tók tilgátuna uppá sína arma.

Sem slík hlýtur tilraunin að hafa haft eitthvað skilgreint markmið og því viðmiðun til að meta árangurinn. - Nú er komið að því að krefjast verður upplýsinga um árangurinn. -Skilaði tilraunin betri almennum námsárangri og/eða öflugri frumkvöðlum á tölvusviði en við má búast úr sambærilegum hópi nemenda í öðrum skólum? -Ef hún skilaði betri árangri á einu sviði var það á kostnað árangurs á öðrum sviðum -eða ekki? -Eða er hún bara mikil útgjöld fyrir heimilin til að ná smáræðis sparnaði fyrir skólann.

Í dag nota allir menntaskólarnir netið með þeim hætti sem MK var bent á sínum tíma að yrði gert innan skamms, þ.e. að hver nemandi á sinn aðgangslykil og heimasvæði sem hann kemst á hvar sem hann sest við tölvu hvort sem er í skólanum eða útí heimi. -Á sama tíma hefur MK hinsvegar sett takmarkanir á hvað nemendur geta gert án þess að koma með tölvurnar sjálfar í skólann. Þ.e. skólinn var síðast þegar ég vissi að hindra greiðan aðgang nemenda sinna að gögnum og sínu svæði væru þeir staddir utan skólans.

Verr settir en aðrir?

Sé það rétt eru nemendur „smartskólans“ því verr settir en nemendur annarra skóla í Reykjavík sem geta sest við hvaða tölvu hvar sem er í borginni eða í skólanum eða hvar sem er í heiminum og gengið beint að sínu efni á skólaneti skólans þeirra.

Það er kominn tími til að MK geri upp við Kópavogsbúa hverju hefur verið áorkað með tölvukvöðinni, og vegi með skýrum mælingum nytsemdina á móti kostnaðinum. Samkvæmt Mogga-fréttinni kosta ódýrustu tölvur sem uppfylla skilyrði MK 130 þúsund,  við það bætist forritakostnaður og taska fyrir að lágmarki 35 þúsund sem gerir 165 þúsund krónur á mann. Heldur óvarlegt finnst mér að reikna með lengri endingatíma en tvö ár á tölvu í svona miklu hnjaski. Kostnaður hvers nemenda er því a.m.k. 330 þúsund krónur á 4 árum. –Hafa þær krónur ávaxtast með mælanlegum og sannanlegum hætti í árangri nemenda MK og betri undirbúningi þeirra fyrir frekara nám?

Menntastofnun sem vill að mark sé tekið á henni hlýtur að hafa lagt til grundvallar svo stórri og dýrri tilraun sem auk þess er framkvæmd á kostnað nemenda sinna að tryggja að árangurinn yrði mældur með traustum og trúverðugum hætti.

Sumir skólar gera kröfu um fartölvueign

Mikil mistök að velja ekki Hillary fyrir forsetaframbjóðanda

Ég óttast að það eigi eftir að reynast afdrifarík mistök hjá Demókrötum að leyfa ekki bara Barack Obama að þroskast áfram næstu 8 ár og að vaxa betur af reynslu og ásmegin og virðingu áður en þeir létu hann ryðja Hillary Clinton úr vegi sínum. Fyrstu konunni í sögu USA sem átti raunhæfa möguleika að sigra frambjóðenda Repúblíkana í forsetaframboði og skortir ekkert af þessu, reynslu, þekkingu og víðtæka virðingu sem hún naut um allan heim einmitt fyrir skynsemi, þekkingu, reynslu og ekki síst kjark og heilindi.

Barack Obama er það ungur að hann ætti bara aukna möguleika eftir 8 ár og eftir 16 ár, - en nú var stund Hillary Clinton komin þegar konan var raunverulega líklegasti frambjóðandinn til að sigra Rebublicanann, - sú stund kemur ekki aftur hvorki eftir 8 ár eða 16 ár fyrst svona fór nú. Leið kvenna verður til muna torsóttari að þessu embætti eftir þetta því það verður bent á að fyrst Hillary átti ekki sjens tekur því ekki að reyna einhvern óþekktari, minni og mýkri jaxl en hún er.

Bandarískar konur misstu mikilvægan sigur úr greipum sér. Fyrir vikið munu þær ekki ala upp dætur sem spyrja í forundran „geta menn verið forsetar“ þegar í framtíðinni einhver af karlkyninu hefði sóst eftir embættinu.

Þorir Obama að hafa svo sterka konu sér við hlið sem varaforsetaefni sitt?

Það væri þó mikill sigur fyrir Barack Obama sjálfan að finnast hann sjálfur vera nægilega stór til að þora að hafa Hillary Clinton sér við hlið sem varforsetaefni.  - Það væru eingöngu misskilin ráð ráðgjafa hans og löngun Obama til að trúa þeim sem gætu talið einhvern annan kost vænlegri en að hafa Hillary með sér þessa vegferð. Og hin raunverulega ástæða væri þá ýmsar útgáfur af ótta við að hún og hennar föruneyti skyggði á hann - það er minnimáttarkennd og kjarkleysi.

Ef Obama er tilbúinn núna er hann stærri en slík minnimáttarkennd - að öðrum kosti er hann ekki tilbúinn hvort sem er og ætti að bíða og þroskast betur og lengur.

Að öllu líkindum táknar þetta frumhlaup og æðibunugangur Demókrata, að ímynda sér að til væri pólitíkus og forsetaefni með nægileg reynslu og þekkingu sem janframt væri ósnortin af Washington, bara það eitt að enn munu liðsmenn Bush ráða ríkjum í USA.

Húseignir McCains vatn á myllu Obama

Verslum aðeins þar sem bensínið er ódýrast hverju sinni

Nú er kominn tími á að t.d. FÍB, Neytendasamtökin, ASÍ og aðrir sem láta sig hag almennings varða komi á vöktun á bensínverði með síuppfærslu á netinu með innhringimöguleika fyrr allan almenning svo ökumenn geti alltaf vitað hvar er ódýrasta bensínið hverju sinni og gætt þess að versla þá aðeins þar.

Olíufélögin lækka ekki verðið ótilneydd.

Komum á virkri sívöktun á bensínverði og verslum aðeins það ódýrasta hverju sinni.

Olíuverð niður fyrir 112 dali tunnan

110 þúsund bílar norðan Smáratorgs á sólarhring árið 2024

Það er athyglisvert að það teljist áhyggjuefni að umferð geti farið í 37 þúsund bíla á sólarhring á Reykjanesbraut hjá Hvaleyrarholti í Hafnarfirði þegar á sama tíma vart nokkur virðist veita athygli áformum bæjaryfirvalda í Kópavogi um 110 þúsund bíla umferð norðan Smáratorgs auk nýrra 70 km vega samhliða Reykjanesbraut í báðar áttir til að létta á henni. Sjálf verði Reykjanesbraut í allt að 12 akreinum og með mjög flóknum nýjum gatnamótum þar sem nú er bensínstöð og 10-11 versun.

Þá er t.d. í umhverfismati á þessu bæjar- og íbúasvæði vegna Glaðheimasvæðisins hvergi minnst á gangandi eða hjólandi vegfarendur á mörgum tugum blaðsíðna þrátt fyrir að reiknað sé með 250 íbúðum á Glaðheimasvæðinu og að íbúar þar muni senda börn sín yfir 110 þúsund bíla veginn í skóla í Smáraskóla og að íbúar beggja vegna við hann sæki atvinnu og þjónustu yfir á Glaðheimasvæðið og svo öfugt yfir á Smáralindarsvæðið. (Athuga ber að hin miklu byggingaáform „12turna-skipulagið“ eru ekki teiknuð inná og sýnd með umferðarmannvirkjunum).

Nú er verið að setja Arnarnesveg á brú yfir Reykjanesbrautina og brúin er hönnuð sem hringtorg með miklum aðreinum en  án allra gangstétta, göngubrúa eða gönguleiða samhliða í sama plani milli þessara tveggja hæða sem eiga verða svona þéttbyggðar að aldrei fyrr hefur sést annað eins á Íslandi. Þegar þessi hönnun er skoðuð sést að nánast engin leið verður að bæta við greiðum gönguleiðum eftirá og ekki er hugsað fyrir þeim fyrirfram, þó endar grænt göngusvæði efst á Nónhæð annarsvegar og hinumegin við veginn tekur við nánast samfellt grænt svæði alla leið að Elliðavatni - á milli er hinsvegar ófært stórfljót og aðeins gert fært fyrir bíla yfir það en hvorki gangandi né hjólandi.

Haft er eftir skipulagsfrömuðum í Kópavogi að hverfin séu hugsuð sem eyjur sem fólk eigi ekki að fara á milli nema á bílum, hvort rétt er eftir haft er spurning en þannig er þetta hannað í reynd.

Draga verður úr rykmengun

Hanna Birna á enga bandamenn í borgarstjórn

Vandinn fyrir Hönnu Birnu væntanlegan borgarstjóra er að í raun stendur hún ein. Í flokknum hennar ríkir glundroði og þar er ekki á neinn að treysta. Hún leitar því ráða annað í baklandið utan borgarstjórnarflokksins líklega til gamalla jaxla eins og Davíðs Oddssonar og co, og þó helst í sinn vinkonuhóp sem er ekki með sjálfstæðum hætti upplýstur um aðalatriði mála heldur aðeins af Hönnu Birnu sjálfri. Þetta einangrar hana þó aðeins enn frekar innan borgarstjórnarflokksins.

Átökin um leiðtogahlutverkið óma líka enn úr herbúð borgarstjórnarflokksins með allskyns tilbúnum og mögulega einhverjum raunverulegum ásökunum í hennar garð um að hún hafa verið völd að upplausninni fyrir 10 mánuðum (sbr umfjöllun Þorsteins Pálssonar í leiðara og túlkun Össurar Skarphéðinssonar á honum).

Hanna Birna virðist einnig af frásöng hennar sjálfrar af aðdraganda þess að Ólafi var kastað fyrir borð hafa viljað beinlínis setjast ofan á borgarstjóra og stjórna hverju smáatriði hjá honum. Jafnvel Davíð Oddsson reyndi ekki að skipta sér af smáatriðum sem öðrum hafði verið falin umsjón með eins og Hanna Birna virðist hafa verið upptekin af gagnvart Ólafi F, hvað þá að Davíð hefði skipt sér af kjaftasögum um samstarfsaðila eins og Hanna Birna virðist hafa borið á borð án þess að spyrja um sannleiksgildi þeirra. - Enginn hinna sem í borgarstjórn sitja vill vera dæmdur eftir slíkum mæli, það atriði einangrar hana því enn frekar. - Af mörgum ástæðum á Hanna Birna því enga raunverulega bandamenn í borgarstjórn Reykjavíkur heldur aðeins óbein tengsl í gegnum peninga- og sérhagsmuni aðila utan borgarstjórnar -  og auðvitað á hún svo væntanlega  stuðningsmenn meðal kjósenda flokksins sem hún þó hefur engin bein tengsl við, en mikilvægasti stuðningshópur hennar er aðild að dyggum persónulegum valdaeflingahópi  kvenna, það skapar henni þó ekki trygga bandamenn í borgarstjórn.

Hafa vart stuggað við Ólafi nema vera öruggir um Óskar

Eftir allt sem á undan er gengið hef ég ekki nokkra einustu trú á að Sjálfstæðisflokkurinn hafi haldið í þennan leiðangur nú að stugga Ólafi Magnússyni fyrir borð nema áður að vera búninn að tryggja sér nýjan áhafnarmeðlim. Leiðari Þorsteins Pálssonar í Fréttablaðinu, yfirlýsingar Guðna Ágústssonar, ýmsum sögum sturtað samtímis í fjölmiðla um hvernig Ólafur F „gæti“ svikið Sjálfstæðisflokkinn. - Og svo strax í kjölfarið er Ólafi hent fyrir borð og gegn öllum fyrri yfirlýsingum Óskars Bergssonar er Óskar kominn í staðinn sama dag.

Allt ber þetta vott um hannaða atburðarás þar sem menn á réttum tímapunkti mýkja fyrst jarðveginn og skapa rétt andrúmsloft fyrir það sem þegar er búið að ákveða og handsala einhverjum dögum fyrr.

- Það fer enginn að segja mér að borgarstjórnarflokkur Sjálfstæðisflokksins hefði tekið minnstu áhættu um að hrekja Ólaf frá sér án þess að vera áður búnir að geirnegla Óskar Bergson um borð í skútuna.

Egill Helgason spyr í blogginu sínu á Eyjunni hvað Ólafur hafi gert af sér til að verðskulda meðferð Sjálfstæðisflokksins. Flokkurinn hafi lofað honum borgarstjórastóli þar til í mars á næsta ári fyrir að splundra Tjarnarkvartetnum, hann spyr hvort Ólafur hafi gert eitthvað sem Sjálfstæðisflokkur hlaut ekki reikna með þegar þeir gerðu hann að borgarstjóra og samþykktu málefnasamninginn fræga við hann. 

Sjálfstæðisflokkur skuldar skýringu um hvað Ólafur gerði sem þeir ekki hlutu að reikna með þegar þeir keyptu hann úr Tjarnarkvartetnum með óvenju feitum bitum og með borgarstjórastólnum til að tryggja honum völdin og sæmdina en neita nú að greiða lengur af skuld sinni þegar ódýrari háseti býðst á skútuna í staðin. Sá er þó líka keypur útúr fyrri  samstarfsyfirlýsingu að þessu sinni þeirri um að enginn fjögurra aðila Tjarnarkvartetsins myndi taka sig útúr til að bjarga Sjálfstæisflokknum þegar þeir yðru leiðir á Ólafi F Magnússyni. Hvernig getur þetta fólk svo treyst hvert öðru þegar svona er til stofnað?

Hanna Birna borgarstjóri

Gerandinn að fullu frjáls en fórnarlambið ófrjálst vegna óttans

Að fá að njóta réttmætrar öryggistilfinningar  eru svo miklir hagsmunir hverrar manneskju að óskiljanlegt er þegar tveir dómarar hæstaréttar telja það meiri hagsmuni, að ribbaldi sem hefur misþyrmt, misnotað og stórskaðað manneskju á líkama og sál og þannig svipt þá manneskju frelsi sem aðeins öryggiskennd veitir, fái óhindraður að hrella hana með nálægð sinni. 

Í raun skiptir engu máli hvort dómararnir telji líklegt eða ólíklegt að hann misgeri í reynd frekar gagnvart fórnarlambi sínu (þeir geta heldur ekki vitað það fyrir víst), ef fórnarlambinu finnst það þurfa að óttast það vegna stórfelldra og endurtekinna fyrri misgerða og finnur sig svipta öryggiskennd af úrræðaleysi sínu yfir mögulegri nálgun misgerðarmannsins, þá á það rétt á að misgerðarmaðurinn sé sviptur því sáralitla broti af sínu frelsi að mega koma nálægt henni.

Fórnarlambið burðast með sitt ófrelsi sem stafar af óttanum við manninn hvert sem það fer og getur hvergi skilið ótann og ófrelsið við sig.  Gerandi í nálgunarbanni þarf hinsvegar aðeins að halda sig frá örlitlum reit hverju sinni allt annað er honum frjálst. - Í raun er það alls engin frelsisskerðing  fyrir gerandann eða  takmörkun nema gerandinn ætli að hrella fórnarlambið með nálægð sinni eða reyna hafa áhrif á það.

Ef gerandi hefur fengið á sig nálgunarbann fær fórnarlambið að njóta vissu um að óhætt sé að hringja til lögreglu og óska eftir aðstoð ef hann aðeins nálgast fórnarlamb sitt þ.e. áður en hann getur valdið frekari skaða eða ógnað meira en svo. Ef hinsvegar ekki er í gildi nálgunarbann getur fórnarlambið ekkert gert þó gerandinn áreiti það með nálægð sinni og viðhaldi ótta um frekari meingerðir og getur ekki kallað til lögreglu fyrr en gerandinn hefur aftur unnið fórnarlambinu skaða.

Réttur og hagsmunir fórnarlambsins til að njóta öryggis og fullvissu um að geta leitað ásjár lögreglu  strax ef gerandinn nálgast það er svo miklu stærri en skerðing á rétti ódæðismanns af að mega ekki nálgast fórnarlamb sitt að óskiljanlegt er hvernig tveir dómarar hæstaréttar verða sammála um að nálgunarbann sé of íþyngjandi fyrir ódæðismanninn.

Drottningarnar farnar að hegða sér ósæmilega

Jæja, nú eru drottningarnar komnar á stjá og teknar að hegða sér ósæmilega eins og jafnan í byrjun ágúst, og það bara hér í skjóli runnanna utan við gluggann hjá mér. Þegar ég verð var við slíkt og þvílíkt er auðvitað mér að mæta með myndvélina. Mér tókst að ná af því ljósmynd þegar ung risastór og litrík bumbubý-drottning hitti miklu minni en ámóta litríkan karl í rauðblaðarósarunnanum okkar. Þegar hún varð mín var flaug hún nokkrar blokkir í burtu með karlinn hangandi aftur úr sér. (Smella ítrekað á myndir til að stækka) Á útlensku heita svona randaflugur „bumblebee“ eða „bombus“ á latínu. Einhver  hefur þýtt „bombus“ sem „humla“ á íslensku án þess þó ég átti mig á til hvers humla vísar þá finnst mér bumbubý  betra og meira lýsandi.

Ræktaðar hunangsflugur og skyldar tegundir kallast hinsvegar „honeybee“ og þá að mínu viti bara hungangsbý á íslensku. Reyndar safnar einmitt bumbubýið gulu frjódufti í lærapokana sína og ber í búið ásamt sykrum sem verða að hunangi við að fá smá for-meltingu, en hunagsbýið safnar fyrst og fremst hunangi.

Á norðlægum slóðum lifir hver bumbubý-drottning aðeins um það bil eitt ár, þernur og karlar lifa ekki veturinn af og líklega að jafnaði ekki nema um 30 daga. Þess vegna verður ung drottning að finna sér karl til að frjóvga eggin sín áður en sumarið er á enda.

Þegar líður á haustið finnur svo unga drottningin sér stað til að leggjast í dvala í yfir veturinn. Þegar vorar og hlýnar á ný losnar drottningin úr dvala tekur að safna fæðu og finnur sér bústað fyrir fjölskylduna yfir sumarið. Þar elur hún þá afkomendur sem karlinn frjóvgaði haustið áður.
Frjóvguð egg gefa öll kvenkyns afkomendur, fyrst ófrjóar þernur sem byggja upp búið og safna próteinríku frjódufti og orkuríku hunangi í búið. Það stjórnast af boðefnum sem móðirin gefur frá sér og kölluð eru ferómón en þegar líður á sumarið dvín efnastarfsemi drottningarinnar og í stað þerna sem þjóna henni verða til nýjar ungar og frjóar drottningar, vel aldar af fæðunni sem þernurnar hafa borið í búið og miklu stærri en þær og þar sem móðirin er hætt að framleiða fermón sækja  þær heldur ekki til baka í búið.

Nú verpir gamla drottningin líka ófrjóvguðum eggjum því sæðisskammturinn frá haustinu á undan er upp urinn. Úr ófrjóvguðum eggjum klekjast hinsvegar frjóir karlar. Karlarnir eru því eingetin afkvæmi drottningarinnar.

Á Íslandi  eru taldar vera til þrjár gerðir bumbubýs eða „humla“.
Sú sem talin er hafi verið hér um ómunatíð er móhumlan eða Bombus jonellus (móbumba).
Sú stóra sem sást hér fyrst sumarið 1979 en hefur orðið mest áberandi seinni ár er húshumlan eða Bombus lucorum (húsbumba).
Nokkrum áratugum fyrr hafði hinsvegar borist hingað garðhumla eða Bombus hortorum (garðbumba) sem er með áberandi hlutfallslega stórt og framsett höfuð í samanburði við hinar. Hún er talin hafi vikið fyrir þeirri stóru eða húshumlunni.

Ég tel mig einmitt hafa myndað höfuðstóra garðbumbu í garðinum okkar fyrir ekki svo löngu, sem hér má sjá á flugi á tveimur myndum. Hér er raninn einnig áberandi en allar hafa þær langan rana eða tungu sem þær geta notað til að teygja sig eftir hunangi.
Sú stóra Bombus lucorum eða húsbumba er frekar auðþekkt af hve stílhrein hún er, af tveimur áberandi gulum röndum sem hvor er alveg á sínum búkhluta og svo hvítum endanum. Vegna þess hve hún er stór áberandi og stílhrein er hún líka vinsælt myndefni víða um heim.

- Ég er hinsvegar ekki nógu vel að mér um bumbubý til að geta sagt um hverrar tegundar þessi ljósa hér neðst er, á Jakobsfíflunum. Þær voru margar saman á túnflöt miklu ljósri en venjulegar húsbumbur sem einnig voru að í hópi ekki langt frá.  Það má segja að þessar ljósu séu nánast al gráhærðar í samanburði og með fleiri litarendur en hinar. - Kannski einhver geti sagt mér það?  - Trúlega eru þetta hinar upphaflegu íslensku móhumlur eða móbumbur. Þá er ég þar með mínar eigin myndir  teknar hér í  Kópavogi af öllum þremur íslensku humlu- eða bumbutegundunum .