"Tad er mælt med ad tu haldir kjafti um malefni Kopavogs..."

Það eru miklir peningar í húfi þegar menn veðja milljónum til að fá að byggja stórhýsamassa og selja íbúðir fyrir milljarða þar sem áður var gert ráð fyrir opnu svæði og kirkju annarsvegar (nú gatan Nónhæð) og litlu þjónustuhúsi hinsvegar (Arnarsmári 32). Maður á samt aldrei beinlínis von á grófum viðbrögðum þessara aðila þó maður tjái skoðanir sínar um slíkar framkvæmdir. Hér hef ég lagt inn tvö innlegg á bloggið mitt um málið, tók til máls og talaði alls 4 mínútur á opnum kynningafundi bæjaryfirvalda í Smáraskóla 28. júní (eins og fjölmargir aðrir)- og ég lét hér inn óklippta og heila hljóðskrá af opna fundinum (sjá hér til hliðar).

En um hádegi daginn eftir fundinn þ.e. í gær þann 29. hringdi 19 ára sonur minn í mig; "heyrðu pabbi það eru að koma skilaboð á símann minn sem líklega eru ætluð þér." "Hvað er það?" "Ja, þau eru mjög skrítin" "viltu ekki bara segja mér hvað það er vinur?" "Nei ég sendi þér bara afrit" "OK". - Skilaboðin voru þessi: 

"Tad er mælt med ad tu haldir kjafti um malefni Kopavogs á almennum vettvangi. Tu skadar okkur."

Undirritað: Siminn.is 

Þegar sonur minn svo kom heim seinna um kvöldið sagði hann mér frá að hans mati undarlegu símtali og hljóðskráin (sjá hér til hliðar) var nefnd. Í kjölfarið fylgdi annað sem hann kaus að svara ekki en fékk þá skilaboð á símsvarann.

En svona til að þeir sem vilja þagga niður í lýðræðislegri umræðu geti komið um það skilaboðum beinustu leið til mín þá er tölvupóstfangið mitt hehau hjá internet.is og Gsm síminn minn er 661 6966, en vinsamlega látið vera að hringja eða senda skilaboð í síma sonar míns eða annarra heimilsmeðlima og hafið helst kjark til að láta fullt nafn fylgja með.

Annað er spurningin um hvort rangt sé gagnvart verktökum og bæjaryfirvöldum að setja inn hljóðskrá sem ég tók sjálfur upp mér til minnis á lítinn Sony diktaón. Fundurinn var opinn borgarafundur ætlaður til kynningar á efni fundarins til íbúa og almennings og þarna var m.a. sjónvarpsupptökuvél (kom í 10 frétum). Hlutur fulltrúa bæjarins og fulltrúa verktakanna hlýtur að teljast sanngjarn þeir héldu einir erindi án andmælenda og íbúar fengu aðeins að leggja fram spurningar (seinni helmingur fundarins) en voru jafnan stöðvaðir ef þeir ætluðu að lýsa skoðunum sínum eða koma með beinar athugasemdir.

Við þurfum ekki að sætta okkur við þetta

Skelfilegt nýtt skipulag fyrir Nónhæð í Kópavogi var kynnt á hverfisfundi í Smáraskóla í gær. Í stað þess að þar verði opið svæði og kirkja eða bænahús eins og aðalskipulag og deiliskipulag hafa gert ráð fyrir í nær 20 ár, sem tígulegt kallast á við Kópavogskirkju hinum megin við dalinn úr lágreistri byggð efst á Nónhæð, voru á fundinum kynntar nákvæmlega útfærðar teikningar, líkön og tölvulíkön af nýjum og stærri Hamraborgarmassa sem skapar Kópavogi enn meiri steinsteypuímynd en áður, með allt að 14 hæða blokkum og 18.000 fermertra tveggja hæða bílastæðakjallara undir allri lóðinni. Hvergi á lóðinni væri hægt að stíga á náttúrlega jörð. Undir leiksvæðum og öllum "grænum svæðum" verða tvær hæðir af bílastæðakjallara og blokkamassinn er svo mikill að sólin nær nánast aldrei að skína niður á milli húsanna á leiksvæðin og "grænu" svæðin (sjá meira um skipulagið hér neðar).

Sagt hefur verið "að sumarið sé tíminn" - til að kynna óvinsæl skipulagsmál og helst á miðjum sólríkum degi - enginn mæti á fundi og annarhver maður sé að heiman í sumarfríi. Það má því merkja hve mikinn hug íbúar hverfisins bera til málsins að salurinn sem ætlaður var til kynningarinnar varð strax fullur og þeir sem komu of seint urðu frá að hverfa. Alger einhugur var í fundarmönnum að andmæla þessum hugmyndum og öllum viðlíka.

Gagnrýnt var að þó Arnarsmári 32 og gatan Nónhæð liggi saman og myndi eina heild voru húsin hvergi sýnd saman, Arnarsmári 32 sem kemur í stað bensínstöðvarinnar og svo massinn á kirkjureitnum.

Reyndar er það mitt álit að ekki eigi að taka í mál að breyta þessari landnýtingu úr opnu svæði með stofnun (kirkju) í íbúðasvæði. Íbúarnir í hverfinu eigi ekki að sætta sig við það. Setja eigi varnarlínuna þar strax því ef á þá breytingu er fallist eru hvergi skýrar línur handan hennar. Öll rök sem borin voru upp fyrir þeirri grundvallarbreytingu á fundinum voru léttvæg, þar á meðal að vegna þess að það væri búið að byggja svo mikið athafnarými upp í loftið á svæðinu yrði að troða íbúðarhúsnæði upp í loftið líka. Einnig að lóðaverð væri svo hátt að auðvitað yrði lóðareigandinn að fá að byggja þétt og mikið til að hafa fyrir lóðarkaupunum. Einfalt svar við því er að hann keypti land sem skipulagt var sem kirkja og opið svæði og það er það eina sem hann getur reiknað með að fá að gera þar.

Sjá líka heimsíðu íbúanna hér

Skelfileg skipulagsmistök yfirvofandi á Nónhæð í Kópavogi

Setja á massa af allt að 14 hæða húsum uppá Nónhæð í stað lítils bænahúss og opins svæðis. (Smellið á myndir til að stækka og svo enn til að stækka meira)

 

 

 

Í dag kl 17.30 þann 28. júní 2007 verður haldinn opinn fundir í Smáraskóla í Kópavogi vegna kynningar á nýju deiliskipulagi fyrir efsta hluta Nónhæðar. Á reit sem Baháar áttu og ætluðu að reisa þar tilbeiðsluhús með opnu svæði í kring. Þannig hefur þessi reitur verið á skipulagi Kópavogs frá því skipulag Nónhæðar var fyrst kynnt fyrir nær 20 árum.  Nú á að kynna nýtt skipulag  fyrir Arnarsmári 32 (bensísntöðin) og nýja götu sem fær nafnið Nónhæð með  allt að 14 hæða íbúðarhúsum og alls um 220 íbúðum á þessum litla reit og undir allri lóðinni verður tvöfaldur bílastæðakjallari, þ.e. hvergi verður stígið á náttúrulega jörð innan lóðarinnar nema með tvær steinsteypuhæðir undir fótum sér.

Svo þétt og hátt á að byggja þarna að samkvæmt skuggalíkönum skín sólin nær aldrei á þau svæði þar sem börn gætu mögulega leikið sér við húsin og umferð og átroðningur um þetta kyrrláta hverfi í heild mun margfaldast.
Öll lóðin verður ofaná steinsteyptu neðanjarðarbílastæðahúsi eins og Kópavogur eigi svo góða reynslu af slíku. Í samanburði við Hamraborgina á hæðinni hinum megin við Kópavogsdalinn mun hún þó vera safn smáhýsa miðað við þetta. Öll þök eiga að vera flöt og þar með er stærsta húsið hærra en hæsta Gullsmárablokkin niðr í Kópavogsdalnum sem 13 hæðir með efstu hæðir innundir hallandi þaki.

Ekki er haft fyrir því að senda upplýsingar til íbúanna með fundarboðinu og göng komu fyrst á vef Kópavogsbæjar í gær. Þar má sjá að þó þessi hús séu sett efst á hæðina og myndir úr þrívíddar tölvulíkönum settar inn í töllöguna er hvergi sýnt hvernig þetta mun bera við himinn heldur alltaf sýnt úr lofti með aðra byggð í bakgrunni - auðvitað til að vekja ekki athygli á hvernig þetta mun gnæfa upp úr byggðinni, því eftir að svona efni hefur verið sett í þrívíddarlíkan er fátt einfaldara en að snú því á alla kannta þar á meðal að sjá hvernig það lítur út frá sjónarhóli venjulegra manna með báða fætur á jörðinni.

Eitthvað alvarlegt er að afgreiðslu í skipulagsnefnd og bæjarstjórn í þessu máli. Ekki er að sjá að Samfylkingin hreyfi neinum andmælum við þessu og bókað er að fulltrúi Samfylkingar í skipulagsnefnd víkur hvert sinn af fundi þegar þessi reitur er til meðferðar án þess að fram komi að annar taki sæti hans. Af því er ekki annað að skilja en hann eigi þar hagsmuna að gæta án þess að sjá til að annar komi í hans stað. Má vera að það sé misskilningur minn. Allstaðar er þó verið að hrúga niður háhýsum í Kópavogi og hver gætir hagsmuna bæjarbúa gagnvart verktökunum og háhýsaplágunni ef fulltrúi Samfylkingar í skipulagsnefnd á þar líka verktakahagsmuna að gæta eins og bæjarstjóri Sjálfstæðismanna?

Skipulag ræður miklu um hvernig hverfi þróast. Hér er mynd úr Nónhæðarhverfinu núna og hinsvegar neðar mynd úr undirgöngum í Hamraborginni.  Kópavogur ætti að þekkja vel hvernig háhýsi með tvöföldum bílastæðakjöllurum undir öllum massanum þróast til lengdar.

.
Hluti af aðalskipulagi Kópavogs 2000-2012 þar sem eins og allt frá 1990 er gert ráð fyrir grænu svæði efst á Nónhæð  með  bæna- og tilbeiðsluhúsi og opnu svæði allt í kring.

Samkvæmt nýju tillögunum hvílir skuggi stöðugt yfir öllu  útivistarsvæðum húsanna sjálfra og þar með lögboðnum leiksvæðum fyrir börn sem eiga að vera við hvert hús í ákveðnu reiknihlutfalli við fjölda íbúða. Þessi skuggamynd miðar við kl 12 í september.

Slóðin að kynningarefni Kópavogsbæjar er hér - smella 

Flottur 17. júní á Rútstúni í Kópavogi

Merkilegt hvað Kópavogur hefur skapað sér sterka 17. júní hefð með skrúðgöngu yfir á Rútstúni neðan við sundlaugina og síðan hátíðarhöldum þar. Þar er alltaf allt fullt af fólki ár eftir ár og þó örstutt sé yfir á skemmtanasvæði Reykvíkinga freistar það ekki þess mikla fjölda sem fylir Rútstúnið á hverju ári. Í raun er vart í annan tíma sem Kópavogsbúar finna svo vel til samstöðu og samkenndar og á Rútstúni 17. júní ár hvert.

Ég tók nokkrar myndir í dag þar á meðal af sýningu leikhóps sem dóttir okkar Hafdís Helga skipar með fimm öðrum sérlega hæfleikraíkum og frjóum stelpum á framhaldsskólaaldri. Ég set myndirnar af leikhópun hér í sér albúm.

Á milli 20-30 þúsund manns í miðborginni

Ótrúlegt hvað fuglar leggja á sig til að verja afkvæmi sín

Fuglar bera ótrúlega hlýjar og sterkar tilfinningar til unganna sinna. Það er merkilegt þegar gæsirnar geta forðað sér sjálfar svo auðveldlega með flugi gera þær það ekki ef öryggi unganna er í húfi heldur standa keikar tilbúnar til að berjast við risastórar skepnur, mennina, til að verja ungana sína, aðrir fuglar leika vængbrotna vesalinga hrópa á athygli og ginna ógnvaldinn á eftir sér í burtu frá ungunum, og þeir sem fljúga upp eru svo allt eins líklegir til að gera árásir úr lofti eins og krían og fleiri.

Það er ótrúlegt hvað allir fuglar leggja mikið á sig til að verja og koma upp ungum sínum þó með mismunandi hætti sé.

Fréttin er hér (einhverra hluta vegna birtist ekki linkurinn með venjulegum hætti). 

Hingað og ekki lengra

Verðum að finna X-faktorinn, afhverju kerfið virkar ekki

Það ætti nú að vera öllum ljóst að eitthvað veldur því að stjórnun fiskveiða á Íslandsmiðum leiðir ekki til þeirrar niðurstöðu sem vænst er þ.e. fiskistofnar hafa ekki eflst s.l. 20 ár heldur hrakar þeim enn þrátt fyrir aðgerðir sem áttu að leiða til hins gagnstæða fyrir löngu síðan. Í ritgerð sem ég skrifaði fyrir meira um 12 árum kallaði ég þetta óþekkta "eitthvað" X-þáttinn þ.e. þá þegar var ljóst að einhver óþekkt stærð og áhrifavaldur olli allt annarri niðurstöðu en vænst var. Enn er X-faktorinn ófundinn hann getur verið náttúrulegur en langlíklegast er að hann liggi í umgengni okkar við fiskimiðin og vistkerfi þeirra, trúlega í þáttum sem af ýmsum ástæðum er tabú að ræða svo sem plæging og sléttun botnsins með stórum botnvörpum sem minnkar yfirborðsflöt botnsins og eyðileggur skjól og búsvæði smádýra sem er grundvöllur að viðgangi botnfiska, afla framhjá vigt, meðafla hent vegna skorts á kvóta, ofveiði á fæðustofnum eins og loðnu og rækju, og margt fleira kemur til greina. Við ættum hinsvegar að gefa okkur að X-faktorinn er til og við þurfum að finna hann til að komast fyrir hann og með markvissri tengingu staðreynda má leiða hann í ljós - líkt og að leysa morðgátu. 

Spá því að þorskkvótinn verði ákveðinn 155 þúsund tonn

Fátt slær við stemningunni í vel heppnuðu brúðkaupi

Systurdóttir mín Kristín Ósk Hjartardóttir gifti sig um helgina honum Stebba sínum. Kristín er sjálf feiknlega góð söngkona með einstaklega mikla og falllega rödd sem hún hefur mikið vald yfir, og hefur eignast trygga og góða vini sem margir eru líka miklir tónlistamenn sem slógu hver öðrum við með frábærum söng- og tónlistaratriðum bæði við athöfnina og svo í veislunni. Léttleiki og óþvingað andrúmsloft gaf einhverja bestu skemmtun sem ég hef lengi orðið aðnjótandi.
Ég stóðst ekki mátið að taka myndir og ætla að smella hér inn nokkrum þeirra til gamans.

Fleiri myndir eru hér í albúmi við hliðina merkt Brúðkaup

Verða líka að gagnast þeim sem vegna veikinda eða fötlunar eru bundnir við heimili sitt

Það er afar mikilvægt að þetta snjallræði þeirra Guðmundar Steingrímssonar og Össurar Skarphéðinssonar að skilgreina störf sem hægt er að vinna hvar sem er, standi líka þeim til boða sem vegna ýmist eigin fötlunar og veikinda eða vegna veikinda maka og fjölskyldumeðlima eru bundnir á heimilum sínum og hafa ekki getað bundið sig í fasta 9-5 vinnu á vinnumarkaði utan heimilis af þeim sökum. Það eru öflugir starfskraftar og margskonar verðmæt reynsla og þekking sem farið hefur forgörðum vegna skorts á viðeigandi tækifærum fyrir þetta fólk sem svo háttar til um, og þeir þurfa ekki síður á tækifærunum að halda til að afla sér og sínum tekna  en aðrir hvar svo sem þeir búa.

Ætla að skilgreina störf sem hægt er að vinna hvar sem er

En hvað þarf að veiða marga hvali til að halda stofnunum niðri?

Eins og ég benti á hér fyrr héldum við því fram þegar við veiddum að jafnaði um 500 hvali að þær veiðar hefðu engin áhrif á stofnana, sama höfum við sagt um "vísindaveiðar" okkar að þær hefðu engin áhrif á stofnstærðir hvala sem fara um hafsvæði Íslands. Nú segir hinsvegar sjávarútvegsráðherra við Sky sjónvarpið að við verðum að veiða hvali til að halda jafnvægi í lífríki hafsins. Þá er eðlilegt að spurt sé: hvað þurfa íslendingar að veiða marga hvali á ári til að geta haldið niðri stofnum sem 500 dýra veiði hafði engin áhrif á (ef eitthvað er að marka okkar eigin málflutning og röksemdarfærslur)? 

Hvort myndu hvalveiðarnar vera sjálfbærar þ.e. ekki skerða eða raska stofnunum? - eða  værum við að veiða til að minnka og halda niðri hvalastofnunum svo þeir tækju ekki frá okkur fisk? - Og hvað  marga hvali þyrftum við Íslendingar að veiða til að geta haft slík árhrif á stofnana ein og sér án veiða stóru hvalveiðiþjóðanna sem veiddu svo margfalt meira en við svo sem Rússar, Portúgalir, Norðmenn, Bandaríkjamenn og Kanadamenn?

Japanar segjast ekki hætta við áform um hnúfubakaveiðar

Brjóta sífellt ítrekað og áfram gegn grundvallarforsendu kerfisins

Þegar ráðist var í að hanna þær breytingar á leiðakerfi Strætó bs sem tóku gildi fyrir tveimur árum var megin forsendan að til að auka notkun almenningssamganga yrði að ná upp þéttri tíðni ferða þannig að notandinn þyrfti ekki að kunna tímatöflur heldur einfaldlega vita að ef hann færi á tiltekna stöð í nágrenni sínu þá kæmi vagn innan fárra mínútna. Til að ná þessu markmiði var kerfið grisjað og svo skipt upp í tvennskonar leiðir, stofnleiðir eða S-vagnana sem næðu þessari krítísku tíðni ferða og færu því á 10 mínútna fresti frá helstu íbúðahverfum beint í helstu skóla-, athafna- og atvinnuhverfi og svo almenna hverfisvagna sem gengju á 20 til 30 mínútna fresti og flyttu farþega í skiptistöðvar eftir þörfum. Talið var að 10 mínútna tíðni stofnleiðanna væri það sem þyrfti til að ná þessari krítísku tíðni að farþegum fyndust þeir ekki þurfa að bíða eða kunna tímatöflu utanað heldur gætu treyst því að ekki væri löng bið í næst vagn bara ef þeir færu útá næstu biðstöð.

Þegar kerfið var svo tilbúið en áður en það var tekið í notkun fannst stjórn Strætó kerfið samt vera of dýrt, þó vandlega hefði verið hönnuð ódýrasta útgáfa sem gat uppfyllt þessa grundvallarforsendu, og krafðist niðurskurðar. Strax í byrjun var því farin sú leið að eyðileggja grunnforsenduna um að farþegi gæti treyst því "að vagninn væri að koma" þar sem ákveðið var að 10 mínútna tíðnin gilti aðeins fyrst á morgnanna og svo aftur í stuttan tíma síðdegis, þá var kvöldtími á 30 mínútna fresti og svo á 60 mín fresti síðast á kvöldin.

Þannig að í stað aðeins 2ja mismunandi tíðnitíma í eldra kerfinu og megin markmiðsins sem hönnuðirnir höfðu lagt upp um að einfalda og þétta tímatöflur í þ.m. fyrir stofnleiðir var nú stjórn Strætó búin að skipta hverju degi á stofnleiðum upp í 5 mismunandi tímatíðni á hverri stofnleið. Fyrst snemm-morguntími á 10 mín fresti, þá miðdegistími á 20 mín fresti, svo síðdegistími aftur á 10 mínútna fresti þá kvöldtími á 30 mín fresti og loks síðkvöldtími á 60 mín fresti. Jafnvel þeir sem notuðu vagnana daglega lærðu ekki hvenær tímarnir breyttust á þeim stöðvum sem þeir þruftu að fara um.

Áframhaldandi hringl og breytingar á tíðni ferða og tímatöflum færa Strætó svo sífellt fjær því að ná mikilvægasta markmiði þeirra breytinga sem stefnt var að þ.e. að farþegar gætu treyst því "að vagninn væri að koma", - í það minnsta á stofnleiðum.

Margskonar annað rugl fylgdi breytingunum og oftast vegna þess að yfirstjórn Strætó gerði breytingar frá vinnu hönnuðanna og í trássi við þá. Strax kom reyndar í ljós að ekki aðeins eyðilagði niðurfelling helmings ferða um miðjan daginn megin tilgang breytinganna heldur kom lítill sparnaður á móti því erfitt var að skipuleggja vinnutíma vagnstjóra þannig að þeir væru í vinnu fyrst í 2-3 klukkutíma snemma morguns, yrðu svo sendir launalaust heim og ættu síðan að koma aftur nokkra klukkutíma síðdegis. En hafa ber í huga að launakostnaður er 90% af rekstrarkostnaði Strætó.

Mér liggur ýmislegt fleira á hjarta um ruglið í rekstri og skipulegi Strætó ætla ekki að hafa þetta lengra núna en má vera að meira komi seinna.

Mikil óánægja meðal vagnstjóra hjá Strætó bs. um breytingar á vaktakerfi